مقال٢

بول طفلى غريب أعمل إيه 😰

إنتو مستهونين بموضوع ملاحظتك لبول طفلك ؟؟
طيب خدو التقيلة دي ... طفل كويس وحلو وبيلعب وبيكبر وبيزيد في الوزن وبيتمرن سباحة وزي الفلّ ، مشكلته الوحيده إن الأم اكتشفت بعد ما قلع البامبرز إنه بيعمل حمّام على نفسه بالنهار وبالليل ، الأم كشفت وعملت سونار ، طلع الولد عنده إرتجاع داخلي وإحتباس للبول "منذ الولاده وتضخم في الحالب والكلى وفقدان في وظيفة الكلى اليسرى بنسبة ٨٠٪‏" !!!!!!!!
شئ صعب جداً .. صح ؟؟
طب خدوا الأتقل بأه ،، الأم رجعت flash-back بالذاكرة لورا وافتكرت ان طفلها عمره في حياته ما عمل بول بشكل مستمرّ !! وكان البول دايماً "متقطع " أو " منقط" وهيا فاكره ان دا عادي !! وعمرها ما سألت دكتور عليه لأنها متعرفش الNormal بتاع الأطفال إيه !! 
كمان دكتور النسا كان نبهها ان في احتباس بول عند الجنين ومحتاجه دكتور اطفال يفسره بعد الولاده وللاسف الدكاتره طمنوها والبيبي كان بيعمل في البامبرز فمبدأتش تاخد بالها غير بعد ما قلعه ( عمر ٣ سنين تقريباً).. وبدأ يعمل على نفسه .. كان خلاص حصل اللي حصل الفترة دي كلها ..
نتعلم إيه بأه ؟؟؟

1. انتي اللي هتشخصي ابنك وانتي اللي هتهتمي بيه اكتر من اي دكتور مهما بلغت شطارته او أمانته فلازم تثقفي نفسك حتى لو ال basics.
2. البول لازم يكون خط واحد one stream مش مقطع ولا منقط ولا معاه وجع او حزق او احمرار وجه وطفلك بيعمله أبداً أبداً.
3. مش مقبول طفلك ميتحكمش في البول بالنهار لاي سبب فوق ٣ سنين ولو لسه بيعمل على نفسه بالنهار لازم لازم سونار فوراً وتحليل ومزرعة بول .

4. السونار إجبارى في الحالات الاتية (AAP) :

* حرارة مع ألم تبول(التهاب مجرى بول) مبتخفش عالمضاد الحيوى المناسب للمزرعة بسهولة .
* تكرار التهاب مجرى البول مرتين (المرة التانية لازم سونار).
* أى التهاب مجرى بول لطفل عمره من شهرين لسنتين.
* أى التهاب مجرى بول معاه "تنقيط" -حتى ولو أول مرة .
* أي طفل عنده التهاب مجرى بول ومش هتقدر تتابعه او تشوفه تاني في الاستشارة لأي سبب.

بالله عليكم ، ولأول مرة أبقى محروق جداً على أطفال ممكن تتبهدل بسبب عدم علم أو جهل بالطبيعي في الأطفال ،، بالله عليكم راجعوا الكلام ده مع أطفالكم ، وعلموا الأمهات ، ونبهوا أولياء الأمور وذكروا الدكاترة ،، يمكن ننقذ طفل من فشل كلوى ،، بحاجة بسيطة جداً ...

"الوعى"...